మహిళా దినోత్సవం సందర్భంగా తల్లి, భార్య, నాయనమ్మ కోసం గరిటె తిప్పిన రామ్ చరణ్

ఇవాళ అంతర్జాతీయ మహిళా దినోత్సవం. ఈ సందర్భంగా టాలీవుడ్ గ్లోబల్ స్టార్ రామ్ చరణ్ చెఫ్ అవతారం ఎత్తారు. తల్లి సురేఖ, భార్య ఉపాసన, నాయనమ్మ అంజనీదేవి కోసం గరిటె తిప్పారు. పన్నీర్ టిక్కా తదితర వంటలను స్వయంగా చేసి కుటుంబ సభ్యులకు తినిపించారు. దీనికి సంబంధించిన వీడియో సామాజిక మాధ్యమాల్లో వైరల్ అవుతోంది. ఈ వీడియోలో రామ్ చరణ్ తో పాటు సురేఖ, అంజనీదేవి కూడా కనిపిస్తారు. ఉపాసన వాయిస్ మాత్రం వినిపిస్తుంది. 

"మీకు తెలుసా... మా అబ్బాయి ఇవాళ మా కోసం వంట చేస్తున్నాడు" అని సురేఖ చెప్పగా... "ప్రతి రోజూ ఉమెన్స్ డే అయితే బాగుంటుంది" అని ఉపాసన చమత్కరించారు. అంతేకాదు, "రామ్ చరణ్ గారు... ఏం వండుతున్నారండీ?" అంటూ ఉపాసన కొంటెగా ప్రశ్నించగా, "పన్నీర్ టిక్కా మసాలా మేడమ్" అంటూ రామ్ చరణ్ బదులిచ్చారు.